હવે તો ઓરેન્જ ઝોનમાં લગભગ દરેક પ્રકારની છૂટ આપવામાં આવી છે. પરંતુ રેડ ઝોનમાં જે લોકો ફસાયા છે એમની પીડા ઓરેન્જ ઝોનવાળા શું જાણે ?
કેમ વીતે અહીં
દિવસ ને રાત
‘ઓરેન્જવાળા’ શું જાણે ?
અહીં ‘રેડ-ઝોન’માં
થઈ ગઈ છે લાલ...
‘ઓરેન્જવાળા’ શું જાણે ?
***
તમે પહેરો છો
પેન્ટ શર્ટ બૂટ...
વળી રોડ ઉપર
મ્હાલવાની છૂટ !
અહીં બર્મુડા
ટી-શર્ટ-સ્લીપરમાં
ઘરમાં ને ઘરમાં
લાગ્યો બૂચ !
ક્યાં બાથરૂમની
ફેશનની વાત ?
‘ઓરેન્જવાળા’ શું જાણે ?
અહીં ‘રેડ-ઝોન’માં
થઈ ગઈ છે લાલ...
‘ઓરેન્જવાળા’ શું જાણે ?
***
તમે હોમથી નીકળો
છો કામ પર,
તમે રળી શકો
થોડા ઘણા દામ પણ...
અહીં હોમમાં જ
જઇએ છે વર્ક પર,
વળી બોસ ઉપરાંત
છે બૈરી પણ !
બોસ બે, શીફ્ટ બે
ડબલ થઈ જે બબાલ
‘ઓરેન્જવાળા’ શું જાણે?
અહીં ‘રેડ-ઝોન’માં
થઈ ગઈ છે લાલ !
‘ઓરેન્જવાળા’ શું જાણે?
***
ત્યાં ટ્રાફિકમાં
ગંધ પેટ્રોલની...
આહાહા...
અને ફેકટરીના
થોડા પ્રદૂષણની !
અહીં દાળનો વઘાર
ગંધ શાકની,
કુકર સીટીઓ વગાડે
... વરાળની !
ટ્રાફિક-જામ કેવો
ટોઇલેટની બ્હાર...
‘ઓરેન્જવાળા’ શું જાણે?
અહીં ‘રેડ-ઝોન’માં
થઈ ગઈ છે લાલ
‘ઓરેન્જવાળા’ શું જાણે?
***
- મન્નુ શેખચલ્લી
Comments
Post a Comment