... એવું થયું હશે

(ઔરંગાબાદ રેલ દુર્ઘટના વિશે)

જ્યારે આપણો બેડરૂમ

વધારે પડતો

ઠંડો થઈ ગયો, અને

આપણે જાગી ગયા...

એ જ વખતે

એ લોકો થાકીને

પાટા ઉપર

સૂઈ ગયા હશે.

***

જ્યારે આપણે

ઠંડી ચાદર

જરા ઉપર ખેંચી હશે..

એ જ વખતે

પેલાં લોખંડી પૈંડાં

ફરી વળ્યાં હશે.

***

જ્યારે આપણે બ્રેકફાસ્ટમાં

બ્રેડ ઉપર બટર

લગાવ્યું હશે...

એ જ વખતે

પેલી સૂકી રોટલીઓના

ફોટા પડ્યા હશે.

***

જ્યારે આપણને ઘરમાં

બ્રેકિંગ ન્યુઝ મળ્યા...

એ જ વખતે

એમની લાશો

શબઘરમાં ગઈ હશે.

***

અને, કોણ જવાબદાર ?

એવી ચર્ચા શરૂ થઈ

એ જ વખતે...

એમને ફોનમાં

‘નો રિપ્લાય’ મળ્યા હશે.

***

કાલે, આપણે આ

કવિતા ભૂલી જશું

એ જ વખતે...

ન્યુઝને નવી

ઘટના મળી જશે

અને હા,

કોઈ નેતાની 

‘એમને’ પણ

‘સાંત્વના’ મળી જશે !

***

ફરી જુની કવિતાઓને

નવી દાદ મળી જશે,

ફેસબુકમાં કવિઓને

વાહ વાહ મળી હશે

એ જ વખતે...

પેલા,

લોખંડી પૈંડાના ડાઘા

સાફ થઇ ગયા હશે.

***

- મન્નુ શેખચલ્લી