મહાભારત સિરિયલમાં કોઈ એક પાત્ર માટે કંઈ કેટલા સંબોધનો વપરાતાં હતાં ? જેમ કે –
“હે વીરપુત્ર, હે પૃથ્વીનરેશ, હે સેનાનાયક, હે જનગણ વિધાયક, હે બાહુબલિ....” વગેરે વગેરે.
એ જ રીતે આજે ડોક્ટરો, નર્સો, પોલીસો વગેરે માટે કેવાં સંબોધનો હોવા જોઈએ ?
***
ડૉક્ટર માટે
“હે ચિકિત્સાશાસ્ત્ર સ્નાતક !
હે રોગ વિનાશક !
હે હૃદયસ્પંદમાપકધારી (સ્ટેથોસ્કોપવાળા),
હે રક્તચાપાંકયંત્રધારી (બ્લડપ્રેશર માપનારા),
હે ઔષધજ્ઞાની !
હે સુધ્ધોધન અંતઃ પ્રક્ષેપણ યંત્રધારી (ઇન્જેક્શનવાળા),
હે સંક્રમણ વિનાશી !
હે પીડાનિવારણકારી !
હે શરીર શસ્ત્રક્રિયા નિષ્ણાત (સર્જરીવાળા),
હે મિતભાષી, મહાજ્ઞાની !
સમાજોપકારક, સ્વાસ્થ્ય સંરક્ષક…
હે કોરોના સંકટ-વિમોચક...
હે કોરોના કાલસ્ય દેવતા!
વિજયી ભવ !
હે સહસ્ત્ર પિડીતોધ્ધારક (હજાર દર્દીઓને સાજા કરનાર),
હે કોરોના સંહારક !
આયુષ્યમાન ભવ !”
***
નર્સ માટે
“હે વિનમ્ર પરિચારિકા !
હે શીતલમુખી !
હે શાતાધારિણી !
હે સુશ્રુષા દેવી !
હે મહાધેર્યધારિણી !
હે ઔષધ ઉપચારિણી !
હે અંતઃપ્રક્ષેપણ દાત્રી (ઇન્જેક્શન આપનારી),
હે શર્કરાપ્રવાહી કુપ્પીદાત્રી (ગ્લુકોઝનો બાટલો ચડાવનારી),
હે તાપમાન માપિકા (તાવ માપનારી),
હે રક્તચાપન માપિકા (બીપી માપનારી),
હે શ્વેતવસ્ત્રધારિણી !
હે શ્વેત મુકુટ ધારિણી !
હે સુંદર સ્મિત ધારિણી !
હે માતૃમમતા દાયિની !
હે સર્વધૈર્ય દાયિની !
હે સર્વઆશા દાયિની !
વિજ્યી ભવ !
કોરોના સંહારિણી ભવ !
પુનઃજીવન દાયિની ભવ !”
***
પોલીસ માટે
“હે ખાખીવસ્ત્રધારી !
હે કષ્ટદંડધારી !
હે શિસ્તપાલક !
હે નિયમનાયક !
હે સમાજ સૈનિક !
હે દિનરાત્રિ પ્રહરી !
હે અપરાધ વિનાશક !
હે અપરાધી પ્રતાડક !
હે સંચારબંધી પાલક !
હે પ્રજાદંડક, પ્રજાનિયામક,
પ્રજારક્ષક એવમ્ પ્રજાપ્રતિપાલક...
વિજયી ભવ !
કોરોનાદંડક ભવ !
કોરોનાવિધ્વંસક ભવ !”
***
- મન્નુ શેખચલ્લી
Comments
Post a Comment