કોરોનાની મહામારીએ બધું ઊંધું-ચત્તું કરી નાંખ્યું છે ! પહેલાં જ્યાં જેવું હતું એના કરતાં આજે કંઈ બીજું જ થઈ રહ્યું છે.
***
પહેલાં...
આપણે હિમાલયના પહાડો જોવા માટે છેક કાશ્મીર સુધી જતા હતા.
આજે...
માત્ર જલંધર સુધી જાવ તોય ચાલે એમ છે !
***
પહેલાં...
‘કુંડાળામાં પગ પડી ગયો છે’ એ વાક્યનો ખરાબ અર્થ થતો હતો.
આજે...
શાકભાજી અને કરિયાણું ખરીદવા માટે બહેનોને રીતસર ‘કુંડાળા’ દોરી આપવામાં આવે છે !
***
પહેલાં...
“પેટ્રોલ-ડિઝલના ભાવ કેમ ઘટતા નથી?....” એવો દેકારો મચાવી મુકતા હતા.
આજે....
મફતના ભાવે મળે છે તોય કોઈ લેવા જતું નથી !
***
પહેલાં....
જે લોકો “પાકિસ્તાનને સીધું કરી નાંખવા માટે વૉર કરી નાખવી જોઈએ” એવું કહેતા હતા...
આજે...
એ જ લોકો લારીની શાકભાજીને ય હાથ લગાડતાં ડરે છે !
***
પહેલાં...
જે લોકો ચાંદ-સિતારા તોડી લાવવાની ડંફાશો મારતા હતા...
આજે...
એ જ લોકો 135નો એક મસાલો ક્યાંયથી લાવી શકતા નથી !
***
પહેલાં...
આખેઆખી મેચ ટીવી સામે બેસીને જોયા કરવાને બદલે ફક્ત છેલ્લી બે-ત્રણ ઓવર જોઈ લેતા હતા, એ જ રીતે...
આજે....
આખો દહાડો ન્યુઝ-ચેનલ સામે ચોંટી રહેવાને બદલે સાંજે પાંચ મિનિટમાં ‘સ્કોર’ જોઈ લઈએ છીએ !
***
અને હા, પહેલાં અમુક લોકોને EVM ઉપર ભરોસો નહોતો, આજે એવા જ લોકોને ‘ટેસ્ટિંગ કિટ’ ઉપર ભરોસો નથી.
***
- મન્નુ શેખચલ્લી
Comments
Post a Comment