લોકડાઉન 1.0... લોકડાઉન 2.0 ...

સુપરહિટ ફિલ્મોની જે રીતે સિકવલ બનતી હોય છે તે રીતે લોકડાઉન પણ 1.0 અને 2.0 તરીકે છવાઈ ગયું છે.

જોવાની વાત એ છે કે બન્નેમાં ખાસ્સો ફરક છે...

***

લોકડાઉન 1.0 માં...

લોકો ચવાણાનાં પેકેટ તોડીને અંદર કેટલી શીંગ, કેટલા મગ, કેટલી સેવ, કેટલા મમરા અને કેટલા મરી છે તે ગણતા હતા...

લોકડાઉન 2.0 માં...

એ જ લોકો કિચનમાં કેટલી થાળીઓ, કેટલી વાટકી, કેટલી ચમચી, કેટલા ગ્લાસ અને કેટલા પ્યાલા-રકાબી છે તે ગણતા થઈ ગયા છે..

***

લોકડાઉન 1.0 માં...

‘મેરે હાલત ઐસે હૈં’… એવા ગાયન ઉપર જાતે જ બોલિંગ કરીને, જાતે જ બેટ વડે બોલને મારીને જાતે જ ફિલ્ડીંગ કરતા હતા...

લોકડાઉન 2.0 માં...

એ જ લોકો હવે સોફામાંથી યે ઊભા થયા વિના પોતાની વધી ગયેલી દાઢી અને ઢંગધડા વિનાના વાળમાં આંગળીઓ ફેરવતાં કહે છે “મેરે હાલત ઐસે હૈં, કિ મૈં કુછ કર નહીં સકતા...”

***

લોકડાઉન 1.0 માં...

જે બહેનો ફેસબુકમાં રોજ પંજાબી, કોન્ટિનેન્ટલ અને સાઉથ ઈન્ડિયન વાનગીઓ બનાવીને તેના ફોટા મુકતી હતી...

લોકડાઉન 2.0 માં...

એ જ બહેનો બળી ગયેલો વઘાર તથા દાઝી ગયેલા શાકના ફોટા પણ નથી મુકતી !

***

લોકડાઉન 1.0 માં...

લોકોએ પ્લાન બનાવી રાખ્યા હતા કે આ ખુલે પછી ગોવા, ઊટી, મનાલિ, સ્વીટ્ઝરલેન્ડ વગેરે જગ્યાએ જવા માટી નીકળી જવું છે...

લોકડાઉન 2.0 માં...

એ જ લોકોને થાય છે કે યાર, પેલા શાકભાજીની લારીવાળાને ઘરમાં બેસાડીને, પોતે લારી લઈને નીકળી પડવું છે !

***

લોકડાઉન 1.0 માં...

સખત ઊંઘ આવતી હતી.

લોકડાઉન 2.0 માં...

ઊંઘ પણ ઊડી ગઈ છે !

***

- મન્નુ શેખચલ્લી