હવે તો આખા દેશમાં 21 દિવસનું ‘લોક-ડાઉન’ જાહેર થઈ ગયું ! જરા વિચારો, આ 21 દિવસ પછી અમુક પતિદેવોની હાલત કેવી હશે ?
***
પતિદેવો શાક સમારતાં શીખી ગયા હશે !
***
વાસણ ઘસવા માટે કયો પાવડર વપરાય છે અને પોતું કરવા માટે કયું ફિનાઈલ કેટલું નાંખવાનું તે આવડી ગયું હશે !
***
રોજ પ્રેશરકુકરમાં કેટલી સીટી વાગ્યા પછી ગેસ બંધ કરવાનો છે તે હવે શીખવવાની જરૂર રહેશે નહીં.
***
એ તો ઠીક, ‘વર્ક ફ્રોમ હોમ’ના બહાને બેટમજી લેપટોપની સામે બેસીને ઝોકું ખાતાં પણ ઝડપાઈ જશે !
***
પરંતુ, ચેતતા રહેજો, 21 દિવસ દરમ્યાન લગભગ તમામ પાડોશણોને ‘નામ’થી ઓળખતા થઈ ગયા હશે !
***
21 દિવસ સુધી હેર-કટિંગ સલુનો બંધ હશે. તેના લીધે તમે જોજો, ડાઈ કરનારા પુરુષોના માથામાં પાંથી પાસે સફેદ કલરનું પીછું ખોસ્યું હોય એવું જોવા મળશે !
***
દરેક ગુજરાતી ન્યુઝ ચેનલના દરેક ન્યુઝ-એન્કરોનાં નામ એમને મોઢે થઈ ગયાં હશે !
***
લેપ-ટોપમાં પેલી ગાળાગાળીથી ભરપૂર વેબસિરિઝો પણ પતી જશે... પછી પતિઓ ટીવીમાં ‘રિપીટ થતા’ એપિસોડ પણ રસથી જોવા માંડશે !
***
છેવટે સોની-મેક્સ ઉપર 1001મી વાર આવી રહેલી ‘સૂર્યવંશમ્’ પણ જોઈ લેશે !
***
અને 21 દિવસ પછી જ્યારે લોક-ડાઉન છૂટશે ત્યારે એવા ઘેલા થઈ જશે કે ઓફિસમાં જઈને સળંગ ત્રણ રાત સુધી ‘ઓવરટાઈમ’ કરી નાંખશે !
***
- મન્નુ શેખચલ્લી
Comments
Post a Comment