ચાર-ચાર દિવસ સુધી નાહ્યા વિના ચલાવી લેનારા યુવાનો માટે ખુશખબર આવ્યા છે : શિયાળો પતવા આવ્યો છે !
એસી, કુલર અને ફ્રીજ વેચતા શો-રૂમો જેની રાહ જોઈ રહ્યા હતા તે… શિયાળો પતવા આવ્યો છે !
પ્રસ્તુત છે આ શુભ અવસર ઉપર એક લઘુકાવ્ય… (કેમકે કવિની પણ ટાઢ ઉડી ગઈ છે !)
***
ના તો ‘બ્રેકિંગ ન્યુઝ’ થયા
ના તો ‘બડા ખુલાસા’
માત્ર ‘વેધર-રિપોર્ટ’માં
વરતારો આવ્યો,
… શિયાળો પતવા આવ્યો !
***
પારો રહી રહીને હવે
30થી ઉપર આવ્યો
સુરજને પણ રહી રહીને
જરીક તાવ આવ્યો,
… શિયાળો પતવા આવ્યો !
***
સ્વેટર મફલર શાલની
હવે વાળો ગડીઓ
મુકો કબાટમાં સાથે એની
ડામર ગોળીઓ…
ફરી પાછો બર્મુડાઓનો
વારો આવ્યો !
… શિયાળો પતવા આવ્યો !
***
ચ્યવનપ્રાશ ને કૌચાપાકની
મોસમ ઢીલી
મોર્નિંગ-વોક ને જોગિંગ-ટ્રેકો
પડશે ખાલી
તડકો છેક બારીએથી
અંદર આવ્યો !
… શિયાળો પતવા આવ્યો !
***
કરો સ્ટાર્ટ પંખાઓ
એસીની સર્વિસ કરાવો
ફ્રીજમાં આઈસ-ક્યુબનું ખાનું
ફરી ભરાવો
કેટલા મહિને આજે હું
ઠંડે પાણી નાહ્યો !
… શિયાળો પતવા આવ્યો !
***
ઉનાળાના ત્રાસ પહેલાં
લઈ લ્યો લ્હાવો,
... શિયાળો પતવા આવ્યો
છેલ્લો છેલ્લો પીવો હોય તો
પી લ્યો કાવો !
... શિયાળો પતવા આવ્યો !
***
- મન્નુ શેખચલ્લી
Comments
Post a Comment