અમુક લોકો ધાબા ઉપર ચડીને માઈકમાં ઉત્તરાયણની કોમેન્ટ્રી આપતા હોય છે !
આજકાલ જે રાજકીય હાલત છે એ જોતાં તમને અમે પોલિટીકલ કોમેન્ટ્રી સંભળાવી રહ્યા છીએ ! જુઓ...
***
પેલી તરફ કાશ્મીરનું ગૂંચવાયેલું કોકડું ઉકલી રહ્યું છે...
***
પરંતુ આ બાજુ CAA અને NRCનાં નવાં ગૂંચવાયેલાં કોકડાં બહાર આવી ગયાં છે...
***
JNUના ધાબા ઉપર દિપીકા જરાક કાંકરીચાળો કરીને જતી રહી એ પછી ત્યાં અંદરોઅંદર નળિયાંમારો ફાટી નીકળ્યો છે...
***
સોનિયાજીની ફિરકી પકડવાની મમતાજીએ ચોખ્ખી ના પાડી દીધી છે...
***
સોનિયાજી પોતાના ધાબા ઉપર બીજા 18 પતંગબાજોને ઉંધિયું ખાવા બોલાવે છે... પણ અડધાને એમાં રસ નથી...
***
CAAની વિરુધ્ધ દિશામાં ખાસ્સો પવન હોવા છતાં રાહુલ ગાંધીની પતંગ ખાસ ચગતી નથી...
***
પ્રિયંકા ગાંધી કકળાટ કરે છે કે હું છૂટ અપાવવા ગઈ હતી ત્યાં મને કોઈએ ધક્કો માર્યો...
***
ફિલ્મી કલાકારોની પતંગો લોટણિયા બનીને બુધ્ધિજીવીઓના ધાબાં તરફ લોટવા માંડી છે...
***
બીજી તરફ બુધ્ધિજીવીઓ પોતાની ફીરકીઓ સાચવવાને બદલે ભાજપની દોરીઓમાં દાંત વડે ‘ઘીસી’ પાડવામાં મશગૂલ છે...
***
પતંગ લૂંટનારા ઝંડાધારીઓ પોતાના ડંડા ઉપર કેમેરા લગાડીને તમાશાનો વિડીયો ઉતારવામાં મસ્ત છે...
***
અમિત શાહ કહે છે કે કોઈ દોરીમાં કોઈ ગૂંચ પડી જ નથી...
***
અમિત શાહ એમ પણ કહે છે કે કોઈને ગૂંચ ઉકેલવામાં રસ જ નથી...
***
છતાં બધા બૂમો પાડી રહ્યા છે : “કાઈપો.... છે... ચલ, લપેટ ! લપેટ !”
***
- મન્નુ શેખચલ્લી
Comments
Post a Comment