ગુડગાંવમાં એક કાકા 15000 રૂપિયાનું ઠાઠીયું સ્કુટર લઈને જતા હતા. એમને હેલ્મેટ વિના, લાયસન્સ વિના, પીયુસી વિના અને આરસી બુક વિના સ્કુટર ચલાવવા બદલ 23000 રૂપિયાનો દંડ થયો ! બોલો.
હજી અમુક લોકોને આ નવા ટ્રાફિક-દંડના ધોરણો સમજાતાં નથી પરંતુ તેને આ રીતે સમજો…
***
સમજુતી :
આખો મહિનો અન-લિમિટેડ ટોક-ટાઈમ વડે મોબાઈલમાં વાત કરવાના માત્ર 149 રૂપિયા…
અને વાહન ચલાવતી વખતે મોબાઈલમાં એક વાર વાત કરવાના 1000 રૂપિયા.
સલાહ :
ચાલુ વાહને પત્ની જોડે વાત કરવી નહિ. ગર્લફ્રેન્ડ જોડે વાત કરવી હોય તો ગાડી સાઈડમાં લઈ લેવી.
***
સમજુતી :
ઓફિસમાં મોડા પડો તો કોઈ દંડ નથી… 000 રૂપિયા.
ઓવરસ્પીડમાં વાહન ચલાવશો તો 5000 રૂપિયા.
સલાહ :
મોડા પડવા બદલ બોસ ખખડાવે તો કહેવાનું “બોલો, તમે 5000 રૂપિયા આપશો ?”
***
સમજુતી :
દારૂ પીને ‘ચંદ્રયાન’ કે ‘મંગળયાન’ ચલાવતાં ઉડતા હશો તો માત્ર 500 રૂપિયા દંડ છે.
અને દારૂ પીને સ્કૂટર કે કાર ચલાવતા પકડાશો તો 10,000 રૂપિયા દંડ છે.
સલાહ :
ચંદ્રયાન કે મંગળયાન ઓન-લાઈન વેચાતું હોય તો બુક કરાવી દેવું. સસ્તું પડશે.
***
સમજુતી :
હિટ એન્ડ રન કેસમાં (ટક્કર મારીને ભાગી છૂટો તો) 2 લાખનો દંડ છે.
અને બે વરસ પછી કોર્ટમાં પુરાવાને અભાવે છૂટી જાવ તો ફ્રી ઓફ ચાર્જ છે.
સલાહ :
અત્યારથી સારા વકીલોનો કોન્ટેક્ટ કરી રાખવો સારો. સલમાનનો વકીલ ઓલરેડી ઓવર-બુક થઈ ગયો છે.
***
સમજુતી :
ઈમરજન્સી વાહન (એમ્બ્યુલન્સ, ફાયરબ્રિગેડ)ને સાઈડ નહીં આપો તો 10 હજારનો દંડ.
સલાહ :
આમાં સમજવા જેવું કશું છે જ નહિ. રોંગ સાઈડથી ઘૂસેલાં 20 વાહન અને ટ્રાફિક જામમાં સાચી સાઈડમાં ફસાયેલાં 30 વાહન વચ્ચે ઈમરર્જન્સી વાહન છુટું મુકીને સરકારે પાંચ-પાંચ લાખ ઉઘરાવી લેવાનો નવો 'ધંધો' ચાલુ કર્યો છે ! મંદી છે ને…
***
- મન્નુ શેખચલ્લી
Comments
Post a Comment