મહારાષ્ટ્ર અને હરિયાણામાં આવતા મહિનામાં ચૂંટણીઓ આવી રહી છે. આવા સમયે કોંગ્રેસે પોતાની (તૂટી ગયેલી) કમર કસવા માટે થોડી ટચૂકડી જાહેરખબરો આપવાનું વિચાર્યું છે...
***
જોઈએ છે તાંત્રિકો
કોંગ્રેસને 10, જનપથની બહાર કયાં કયાં અને શું શું નડે છે તે શોધીને તેની નડતર નિવારણ વિધિ કરી આપનારા તાંત્રિકો જોઈએ છે.
ખાસ નોંધ : 10, જનપથની બહારનું જ શોધવાનું છે. અંદર શું નડે છે તે તો બધા જાણે છે.
***
જોઈએ છે ટુર-ઓર્ગેનાઈઝર
એક યુવાન અને આશાસ્પદ નેતાને ચિંતન, મનન કે શુધ્ધિકરણ.... કોઈપણ બહાને આ એક મહિના માટે ક્યાંક અજ્ઞાત સ્થળે મોકલી આપનાર ટુર ઓર્ગેનાઈઝર જોઈએ છે.
કારણ કે અમારા નિષ્ણાતો કહે છે કે એ યુવા નેતા જ્યાં નથી ફરકતા ત્યાં કોંગ્રેસની જીતના ચાન્સ વધી જાય છે.
***
જોઈએ છે ‘વાયરસ’ ડેવલપર
વોટ્સ-એપ, ફેસબુક, ટ્વીટર, ઇન્સ્ટાગ્રામ કે અન્ય તમામ પ્રકારના સોશિયલ મિડીયામાં જ્યાં જ્યાં ‘રાહુલ’ કે ‘પપ્પુ’ શબ્દ આવે તે મેસેજ એની મેળે ‘ડિલીટ’ જ થઈ જાય તેવો વાયરસ બનાવી આપનારા જિનિયસો જોઈએ છે.
- ઈનામમાં પી. ચિદમ્બરમ્ના સ્વીસ-બેંકના ખાતાના પાસવર્ડ આપવામાં આવશે. રકમ જાતે હેક કરી લેવી.
***
જોઈએ છે પદયાત્રીઓ
ગાંધી જયંતિ નિમિત્તે ભારતનો શાહી પરિવાર મહારાષ્ટ્રમાં પદયાત્રા કરવા નીકળવાનો છે તે સમયે તેમની સાથે પદયાત્રા કરનારા સાહસિકો જોઈએ છે.
ખાસ નોંધ : ‘પદ’નો અર્થ ‘પગ’ જ કરવો, ‘સત્તાસ્થાન’ નહીં,કારણ કે એ ચીજ હાજર સ્ટોકમાં ઓછી છે.
***
જોઈએ છે આંદોલનકારીઓ
જો આખેઆખી કોંગ્રેસ એના પ્રમુખ વિના ચાલી શકે છે તો આ બે વિધાનસભાઓ ચૂંટણી વિના કેમ ના ચાલી શકે ? એવું આંદોલન કરનારાઓ જોઈએ છે...
- ચૂંટણી લડી લડીને થાકી ગયા છીએ ભૈશાબ, હવે થોડીવાર તો શાંતિ રાખો, મોદી સાહેબ ?
***
- મનુ શેખચલ્લી
Comments
Post a Comment