મોદી સાહેબ કહે છે કે બીજાની ભાષાનો રોજ એક નવો શબ્દ શીખો ! આમ કરતાં કરતાં તમે વરસના 300 નવા શબ્દો શીખી જશો.
અમે કહીએ છીએ કે 300 શા માટે ? અમુક લોકો માત્ર બે-ચાર શબ્દો બોલે તોય કેટલી ઝંઝટો મટી જાય ?...
***
જેમકે, જો મમતા બેનરજી માત્ર ત્રણ શબ્દો બોલે કે…
“જય શ્રી રામ !”
તો બોલો, આખા બંગાળમાં કેટલી બબાલો થતી અટકી જાય ?
***
અને પેલા યુપીના નેતા આઝમ ખાન માત્ર ચાર શબ્દો બોલે :
“ભારત માતા કી જય !”
***
અરે, રાહલ ગાંધી માત્ર એક વાર જાહેરમાં ત્રણ જ શબ્દો બોલી જાય કે…
“મૈં શાદી કરુંગા !”
તો બિચારા હતાશ-ઉદાસ થઈ ગયેલા હજારો કોંગ્રેસીઓ કેવા ખુશખુશાલ થઈ જાય ?
***
એમ તો, ડોનાલ્ડ ટ્રમ્પ માત્ર એક જ શબ્દ બોલતાં શીખી જાય…
“સાચું”
***
અને પી. ચિદમ્બરમ્ , CBIની પૂછપરછના જવાબમાં ભારતની કોઈપણ ભાષામાં આ એક શબ્દ બોલે…
“હા”
***
અથવા ઈમરાન ખાન માત્ર એક જ શબ્દ ત્રણ વાર ઈમાનદારથી બોલે..
“શાંતિ… શાંતિ… શાંતિ… ”
***
અરે, એ બધું છોડો, વિરાટ કોહલી મેદાનમાં ગુસ્સે થઈને જે કંઈ બોલે છે એ બોલતાં પહેલાં માત્ર બે જ શબ્દો બોલતાં શીખી જાય કે –
“માનનીયશ્રી… આદરણીયશ્રી…”
***
શશી થરૂર, જેમણે આ ચેલેન્જ સ્વીકારી છે એ એકવાર..
સિમ્પલ રીતે સિમ્પલી ‘સિમ્પલ’ બોલી બતાડે !
***
અને હા, મોદી સાહેબ ફક્ત એક વાર બે જ શબ્દો બોલે કે…
“ખાવા… દઈશ !”
તો બોસ, દેશના કેટલા બધા લોકો રાતોરાત એમના ભક્ત બની જાય ?
***
- મન્નુ શેખચલ્લી
Comments
Post a Comment