મદિરા-એ-ગુજરાત ... એક ગઝલ !

રહસ્ય છે, રોમાંચ છે

થ્રિલ છે, સસ્પેન્સ છે

જ્યારે ઘરે, પીઓ મદિરા

આપણા ગુજરાતમાં !

***

શંકાઓ અહીં સળવળે

દ્રષ્ટિઓ ઉપર-તળે

ફરી વળે પ્રશ્નાર્થો, ને

પાડોશીઓ ખળભળે...

જ્યાં જુએ, તમારા હાથમાં

છ-છ પેકેટ...

શિંગ-ભૂજિયાં !

રહસ્ય છે, રોમાંચ છે

થ્રિલ છે, સસ્પેન્સ છે

જ્યારે ઘરે, પીઓ મદિરા

આપણા ગુજરાતમાં !

***

ખૂફિયા ‘પ્લાનિંગ’ હોય

‘માલ’ની પૂછતાછ હોય

‘ડિલીવરી’ ચૂપચાપ હોય

કેશમાં ‘પેમેન્ટ’ હોય

તે છતાંયે સમુંસૂતરું

પાર સઘળું ઉતરે..

જો આપની કોઈક સારી

ક્યાંકની ‘ઓળખાણ’ હોય !

‘કોન્ટેક્ટસ’ છે

‘રેફરન્સ’  છે

‘ટ્રસ્ટ’ વિથ

‘એશ્યોરન્સ’  છે...

આપણા ગુજરાતમાં !

***

સોમ-મંગળ જાય છે

બુધ-ગુરુ પણ જાય છે

શુક્ર ને શનિ લગી

ઊભા ઊભા.. ઊભા ઊભા..

પૂછે અમદાવાદીઓ

નક્કી કરો ભૈ,

નક્કી કરો...

હવે તો ‘બેસવું’  છે ને ?

દર્દ છે, પીડાઓ છે

ઊંડી સહનશીલતાઓ છે

છે વિરહ, ને

છે ધીરજ...

આપણા ગુજરાતમાં !

***

અહીં વીરલ કોઈ જ એ

પ્રાપ્તિ જેને સહજ છે

નહિતર જોજનો

દૂર જઈ...

આબુ, દમણ ને

દીવ જઈ...

મોક્ષ-પ્રાપ્તિ થાય છે !

કેવી કેવી શ્રધ્ધા-ભરી

જાતરાઓ, ધામ છે...

આપણા ગુજરાતમાં !

***

કંઈ તળેલાં કાજુઓ

ને કંઈ સ્પેશીયલ શીંગ

કંઈ કરકરી દાળ-મૂઠ

ને કંઈક તીખી સેવ...

પાનને ગલ્લે લટકતાં

પેકેટોને જોઈ જોઈ

સાવ ક-ટાણે

કેવી - કેવી..

તલબ લાગી જાય છે !

મોહ છે, મોહ-પાશ છે

કે છે કોઈ મૃગ-છલના ?

ભાસ છે...

આભાસ છે…

આપણા ગુજરાતમાં !

***

કેટલું પીવું ?

કેમ પીવું ?

‘જ્ઞાનસત્રો’ થાય છે !

કેટલું પીધું ?

ક્યારે ? કોણે ?

‘વિક્રમો’ સંભળાય છે !

કોણ અઠંગ

ને કોણ પીઠ્ઠુ...

‘દંતકથાઓ’  હોય છે !

શૌર્યરસ છે

વીર રસ છે

આઈસ-ક્યુબની પાસમાં ...

ફોરેન લિકર

ઠંડી નસોમાં

‘ગુજ્જુ’ બનતું જાય છે...

આપણા ગુજરાતમાં !

***

- મન્નુ શેખચલ્લી