સમાચાર
કહે છે કે ઇંગ્લેન્ડના ક્રિકેટર બેન સ્ટોક્સને ‘ન્યુઝિલેન્ડર ઓફ ધ યર’ના એવોર્ડ માટે નોમિનેશન મળ્યું છે.
વઘાર
લો, એ હિસાબે ‘પાકિસ્તાની ઓફ ધ યર’ના એવોર્ડ માટે ભાજપ પાસે તો આખું લિસ્ટ તૈયાર છે !
***
સમાચાર
કર્ણાટક વિધાનસભામાં વિશ્વાસનો મત ડ્રામા 96 કલાકથી વધારે ચાલ્યો.
વઘાર
અને તમને શું લાગે છે, માત્ર વર્લ્ડકપની ફાઈનલનો ડ્રામા બહુ લાંબો હતો ?
***
સમાચાર
કુમારસ્વામી હજી ફરીવાર સુપ્રિમકોર્ટમાં જવા માગે છે.
વઘાર
હું શું કહું છું, હવે વર્લ્ડ-કપની ફોર્મ્યુલાથી પતાવો ને ? જે સાઈડના ધારાસભ્યોના નામે સૌથી વધારે ભ્રષ્ટાચાર નોંધાયો હોય એ વિજેતા !
***
સમાચાર
રેલ્વે સ્ટેશનના પ્લેટફોર્મ ઉપર ચીજવસ્તુઓ વેચતા ફેરિયાઓએ હવે નાનામાં નાની ચીજનું બિલ આપવું જ પડશે.
વઘાર
વાહ ! મતલબ કે ભજિયાં, સમોસા, ચનાચોર ગરમ, ભેળપુરી, ચાટપુરી વગેરે ચીજો હવે પસ્તીના કાગળમાં નહિ પણ ડાયરેક્ટ બિલમાં જ મુકીને આપશે ?
***
સમાચાર
‘ટિક-ટોક’ અને ‘હેલો’ એપનો ઉપયોગ દેશદ્રોહી પ્રવૃત્તિઓ માટે થઈ રહ્યો હોવાનો આરોપ છે.
વઘાર
આ સાંભળીને લશ્કરે-તોયબા અને હિઝબુલના આતંકવાદી કમાન્ડરો ખુશીથી નાચવા લાગ્યા છે કે ભારતની 50 લાખ મહિલાઓ ફક્ત આપણે માટે જીવના જોખમે જાસૂસી કરી રહી છે !
***
સમાચાર
કરન્સી માર્કેટમાં રૂપિયાનો ભાવ ઘટ્યો, સોનાનો ભાવ અચાનક વધ્યો.
વઘાર
લાગે છે કે કર્ણાટકના ધારાસભ્યો કેશને બદલે સોનુ માગી રહ્યા છે !
***
- મન્નુ શેખચલ્લી
Comments
Post a Comment