આજે વર્લ્ડ-કપમાં ભારત અને ઇંગ્લેન્ડ વચ્ચે મેચ છે અને આજે સૂચનાઓ ઇંગ્લેન્ડના પ્રેક્ષકોને આપવાની છે…
***
જો તમારી પાસે સ્ટેડિયમની ટિકીટ હોય તો કોઈ ઇન્ડિયનને વેચી મારો !
- આર્થિક ફાયદો તો થશે જ, ઉપરથી માનસિક યાતનામાંથી બચી જશો….
***
સ્ટેડિયમમાં જ બેસીને મેચ જોવી હોય તો કાનમાં રૂનાં પુમડાં અગાઉથી ખોસીને જજો !
- ક્યાંક પૂમડાં ખોસતાં કેમેરામાં ઝડપાઈ જશો તો બહુ ‘વાઈરલ-નામોશી’ થશે…
***
સીટના પૈસા ભલે ચૂકવ્યા હોય પણ ‘બેસી રહેવાથી’ તો પૈસા પડી જશે !
- કારણ કે લહેરાતા તિરંગા, નાચતા ઇન્ડિયનો અને બોલે બોલે ઊભા થઈ જતી ભીડમાંથી મેદાન તો દેખાશે જ નહીં…
***
તમે ઇન્ડિયામાં 200 વરસ રાજ ભલે કર્યું પણ એક જ ભૂલ કરી !
- અમને ક્રિકેટ રમતાં શીખવાડી દીધું !
***
ચીસાચીસ, બૂમાબૂમ, ઘાંટાઘાટી, કિકિયારીઓ, ઢોલ-નગારાં, મંજીરાં, નારાબાજી, હાય… હાય…., વાહ… વાહ… આ તમામ ઘોંઘાટથી અકળાઓ નહીં…
- ક્રિકેટ એ જેન્ટલમેન ‘ખેલાડીઓની’ રમત છે, જેન્ટલમેન ‘પ્રેક્ષકોની’ નહીં !
***
જો તમે એમ વિચારીને મનમાં રાજી થતા હો કે ટિકિટોની કમાણી તો ઇંગ્લેન્ડની છે, તો તમે ખાંડ ખાઓ છો !
- કારણ કે એમાં 50 ટકા કમાણી ICCની છે અને ICC ઉપર ઇન્ડિયનોનો જ કબજો છે !
***
સ્ટેડિયમમાં પાકિસ્તાની પ્રેક્ષકોને શી રીતે ઓળખશો ?
- ઇંગ્લેન્ડની વિકેટ પડી જાય પછી તમામ નાચ-ગાના શાંત પડી ગયા હોય છતાં જે લોકો હજી ઉછળ-કૂદ કરતા દેખાય એ જરૂર પાકિસ્તાનીઓ હશે !
***
અને હા, મેચ દેખતે દેખતે હમેરા ઢોકળા, થેપલા, ભજીયા, વડા વગેરે ખાતે જાના… હોં ?
***
- મન્નુ શેખચલ્લી
Comments
Post a Comment