ડબલ ડબલ સિઝન એકસાથે ચાલી રહી છે. એક બાજુ આઈપીએલ ચાલી રહી છે તો બીજી બાજુ ચૂંટણીઓનો ધમધમાટ છે.
જોવાની વાત એ છે કે બન્નેમાં અમુક વાતો સરખી છે, છતાં અમુક વાતો જુદી છે !
***
આઈપીએલમાં ફિલ્ડિંગ ઉપર નિયંત્રણ હોય છે... માત્ર છ ઓવર માટે.
ચૂંટણીમાં ખર્ચ ઉપર નિયંત્રણ હોય છે.... માત્ર હિસાબમાં બતાડવા માટે !
***
આઈપીએલમાં ‘નો-બોલ’ પડી જાય તો સામેવાળાને ‘ફ્રી-હિટ’ મારવાનો ચાન્સ મળી જાય છે.
ચૂંટણીમાં પણ કંઈ ઊંધું-ચત્તું નિવેદન થઈ જાય તો સામેવાળા ચડી બેસે છે !
***
આઈપીએલમાં થર્ડ-અંપાયર 30 થી 50 સેકન્ડમાં એકશન રિ-પ્લે જોઈને આઉટ કે નોટઆઉટનો નિર્ણય આપી દે છે.
ચૂંટણીમાં ચૂંટણીપંચ માત્ર ફરિયાદ કરી શકે છે... કોર્ટમાં ફેંસલો આવતાં મહિનાઓ નીકળી શકે છે.
***
આઈપીએલમાં વચ્ચે બે વખત ‘સ્ટ્રેટેજિક ટાઈમ-આઉટ’ જેવી રિસેસ પડી જાય છે.
ચૂંટણીમાં રિસેસ તો છોડો, અડધી રાતે પણ સામસામી સ્ટ્રેટેજીઓ ઘડવાનું ચાલું રહે છે.
***
આઈપીએલમાં ખેલાડીઓના કરોડોમાં ભાવ બોલાય છે. એમની ખુલ્લેઆમ હરાજી થાય છે. હરાજી પહેલાં એમની કિંમત જાહેર થાય છે. કરોડો કમાતા ખેલાડીઓ લાખોનો ટેક્સ પણ ભરે છે....
ચૂંટણીમાં જરાક જ જુદું છે. અહીં ખેલાડીઓને એક ટીમમાંથી બીજી ટીમમાં ખેંચવા માટે ભાવ તો બોલાય છે, પણ ખાનગીમાં ! કિંમત સ્વરૂપે કાં તો ટિકિટ મળે છે કાં તો મંત્રીપદ !
વળી, ચૂંટણી પહેલાં ચૂંટણીના ખેલાડીઓ પોતાની મિલકત તો જાહેર કરે છે પણ ટેક્સ કેટલો ભરે છે એ ખબર પડતી નથી !
***
આઈપીએલમાં એક સમયે એક જ બોલર બોલિંગ કરે છે અને એક જ બેટ્સમેન સામનો કરે છે.
ચૂંટણીમાં આજકાલ બાવીસ બોલરો બાઉન્સર ફેંકી રહ્યા છે અને એક બેટ્સમેન સમજે છે કે આ જ એનો વટ છે !
***
- મન્નુ શેખચલ્લી
Comments
Post a Comment