આજથી IPL શરૂ થાય છે ! આજથી રોજ સાંજ પડ્યે ટીવીનાં રિમોટ સ્ત્રીઓના હાથમાંથી છિનવાઈને પુરુષોના હાથોમાં આવી જવાનાં !
અમે કહીએ છીએ કે IPLમાં બહેનોને પણ રસ પડે એવું કંઈક કરો ને ? (આમેય એ લોકો લાંબી લાંબી સિરિયલો જોઈને કંટાળ્યાં છે.)
અમારી પાસે કેટલાક જોરદાર આઇડિયાઝ છે…
***
જોડીયાં બનાઈયે
બધા પુરુષો જ ક્રિકેટ રમ્યા કરે એમાં શું મઝા આવે ? ‘બેટ્સમેન’ અને ‘બેટ્સવુમન’ની જોડીઓ બનાવો… જરા રોમેન્ટિક લાગશે !
***
ગ્લેમર બઢાઈયે
‘બેટ્સમેનો’ ફાળિયાં, પાઘડી, ચોયણો, જોધપુરી કોટ, ખેસ, મોજડી, એવાં જાજરમાન કપડાં પહેરીને ગ્રાઉન્ડમાં આવશે અને ‘બેટ્સવુમનો’ ખુલ્લા વાળ, પુરો મેકપ, જાતજાતની સાડીઓ અને ડ્રેસિસ પહેરીને મેદાનમાં ઉતારશે…
***
પરંપરા દિખાઈયે
‘બેટ્સમેન’ અને ‘બેટ્સવુમન’ની જોડી મેદાનમાં ઉતરે એ પહેલાં એમને ચાંદલા, તિલક, દોરા ધાગા અને આરતી વગેરે પછી, ટોટલ ‘બિદાઈ’ની રસમ સાથે મોકલવાનાં રહેશે….
***
ટ્રેજેડી કો બહેલાઈયે
જ્યારે જ્યારે ‘બેટ્સમેન’ અને ‘બેટ્સવુમન’ની જોડી તૂટે ત્યારે સ્ટેડિયમની સાઉન્ડ સિસ્ટમમાંથી વાયોલિનના કરુણ સુર ગુંજી ઊઠવા જોઈએ, જેથી બધી મહિલા ક્રિકેટરો ચોધાર આંસુએ રડી શકે !
***
લવ-ટ્રાએંગલ બનાઈયે
ધોનીની જોડી કોઈ ન્યુઝિલેન્ડની બેટ્સવુમન જોડે બનાવો ! કોહલીની સાથે કોઈ ઇંગ્લેન્ડની બ્યુટિને સેટ કરો… પછી બતાડો કે ધોનીની વાઈફ સાક્ષી અને કોહલની પત્ની અનુષ્કા સ્ટેડિયમમાં બેઠાં બેઠાં કેવાં કેવાં વેણ ઉચ્ચારે છે !
***
કિચન-પોલિટિક્સ લાઈયે
ભોજન વિરામ વખતે એક્સપર્ટો બકબક કર્યા કરતા હોય એમાં શું જોવાનું ?
ખરું ટેન્શન તો કીચનમાં છે… કોહલીના એનર્જી ડ્રીન્કમાં ઊંઘની દવા કોણે મિલાવી દીધી ? રોહિત શર્માની સેન્ડવીચમાં લાલ મરચાં કોણે ભભરાવ્યાં ? રિષભ પંતની પિત્ઝા-ડિલીવરીને રસ્તામાં કઈ છોકરીએ અટકાવી ?
***
મહાએપિસોડ મેચ દિખાઈયે
ફક્ત બે ટીમો વચ્ચે મેચો થાય એમાં શું જોવાનું ? મહાએપિસોડ મેચમાં સામસામી ચાર-ચાર ટીમોને મેદાનમાં ઉતારો… ‘જોડીયાં’ની અદલાબદલી, થાય, બેટ વડે મારામારીઓ થાય, બોલમાંથી બોમ્બ ફૂટે…
- અને અંપાયરોની ‘યાદદાસ્ત’ ચાલી જાય !!! શું કહો છો…
***
- મન્નુ શેખચલ્લી
Comments
Post a Comment