આજકાલ યુવા પેઢીને PUBG ગેઈમનું ઘેલું લાગ્યું છે.
સૌ કહે છે આ ગેઈમ ખરાબ છે. એટલે જ અમને વિચાર આવ્યો કે PUBGથી કેવા કેવા ફાયદા થાય છે…
***
સૌથી પહેલો ફાયદો તો એ કે યુવાનો આ ત્રણ-ચાર-પાંચ કલાક દરમ્યાન ભલતી સલતી પોર્ન-સાઈટ વગેરેથી દૂર રહે છે.
***
બીજો ફાયદો એ છે કે ભારતની ભાવિ પેઢીને જાણવા મળે છે કે કેટલી જાતની મશીનગનો કેટલી જાતની રિવોલ્વરો અને કઈ કઈ ટાઈપના બોમ્બ હોય છે.
***
અંગૂઠાને કસરત મળે છે એ તો સમજ્યા પણ અંગૂઠા વડે યુધ્ધો લડવાની ટ્રેનીંગ પણ મળી રહી છે. કારણ કે ભવિષ્યમાં યુધ્ધો આવી જ કોઈ ટેકનોલોજી વડે લડાવાનાં છે !
***
સૌથી મોટી શીખવાલાયક બાબત (ખાસ કરીને ગુજરાતી યુવાનોને) એ છે કે લડાઈ લડતાં લડતાં કંટાળો આવે તો ક્યાંક સંતાઈને સૂઈ જવાનું ! ભલે લડતા બીજાઓ…
***
આ ગેઈમ અહિંસાના પાઠ ભણાવે છે... કેમ કે આપણે મારીએ છીએ છતાં કોઈ મરતું નથી !
***
આ ગેઈમ એવું પણ શીખવે છે કે ‘આત્મા અમર છે !'... કારણ કે ગેઈમમાં મરી ગયા હોઈએ છતાં બીજી ગેઈમ માટે પાછા જીવતા જ હોઈએ છીએ !’
***
પપ્પા-મમ્મીને ઈમોશનલી બ્લેક-મેલ કરવા માટે પણ આ ગેમ બેસ્ટ છે. ભલે આપણને એનો ક્રેઝ હોય કે ના હોય, છતાં અમથી અમથી ધમકી આપી દેવાની કે “જો મને નવું જિન્સ નહીં અપાવો તો હું આપઘાત કરી નાંખીશ ! હા…”
***
અને હા, જ્યારે તમે પોતે વડીલ થઈ જાઓ ત્યારે તમે ફાંકા મારી શકશો કે "હું તો એક જ સેશનમાં 500-500 દુશ્મનોને મારી નાંખતો હતો ! મને તો ઈન્ડિયન આર્મીમાં જોઈન થવાની ઓફર બી આવેલી, પણ તારી આન્ટીએ ના પાડી ..."
***
- મન્નુ શેખચલ્લી
Comments
Post a Comment