બંગાળમાં CBI રેઈડ પાડવા ગઈ એ પછી જે નાટકો, ભવાઈ અને ભવાડા થયા એ જોતાં અમને જુની કહેવતો ઉપરથી નવી નવી કહેવતો યાદ આવી રહી છે.
***
જુની : કરવા ગયા કંસાર, ને થઈ ગઈ થૂલી
નવી : કરવા ગયા પૂછપરછ, ને થઈ ગઈ ધરપકડ !
***
જુની : ધરમ કરતાં ધાડ પડી.
નવી : તપાસ કરતાં ટપલી પડી !
***
જુની : ખાયા પીયા કુછ નહીં, ગિલાસ તોડા બારા આના.
નવી : ખોજા પૂછા કુછ નહીં, પ્રોટોકોલ તોડા, સૌ હેડલાઈન !
***
જુની : નેકી ઔર પૂછપૂછ ? તૌબા તૌબા…
નવી : ચીટફંડ ઔર પૂછપૂછ ? તૌબા તૌબા !
***
જુની : જે દુઃખે બાવા થયા એ તો ત્યાંનું ત્યાં જ
નવી : જે શોધવા બંગાળ ગયા, એ તો ઠેરનું ઠેર !
***
જુની : આગ લાગે ત્યારે કૂવો ખોદવો.
નવી : કોઈ કૂવો ખોદવા આવે ત્યારે જ આગ લગાડવાની !
***
જુની : પોપટ ભૂખ્યો નથી, પોપટ તરસ્યો નથી, પોપટ આંબાની ડાળે મઝા કરે
નવી : સીબીઆઈ નબળી નથી, સીબીઆઈ ભોળી નથી, સીબીઆઈ કોલકત્તાની ડાળે આરામ કરે..
***
જુની : હીરો ઘોઘે જઈ આવ્યો, ડેલીએ હાથ દઈ આવ્યો
નવી : સીબીઆઈ કોલકતા જઈ આવી, મમતાને બહાનું દઈ આવી !
***
જુની : દુઃખે છે પેટ, ને કુટે છે માથું
નવી : નડે છે કૌભાંડ, ને કરે છે ધરણાં !
***
જુની : શૂળીનો ઘા સોયથી ટળ્યો
નવી : સીબીઆઈની રેઈડ, ધરણાંથી ટળી
***
જુની : હોઠ સાજા તો ઉત્તર ઝાઝા
નવી : કૌભાંડ ખુલે તો ગઠબંધન ઝાઝાં !
***
જુની : આવ ભાઈ હરખા, આપણે બેઉ સરખા
નવી : આવો રાહુલ – મમતા, આપણે બેઉ સરખા !
***
જુની : સાપ ગયા ને લીસોટા રહ્યા
નવી : ચીટફંડ ગયા ને દાવપેચ રહ્યા !
***
- મન્નુ શેખચલ્લી
Comments
Post a Comment