હમણાં અમે વોટ્સએપમાં એક વિડીયો જોયો. એમાં બતાડ્યું છે કે હવે એવા પાતળા મોબાઈલો આવવાના છે કે તમે એને ગડી વાળીને ગમે ત્યાં મુકી શકશો !
લો બોલો ! એ પછી તો…
***
સૌથી પહેલાં બહેનો આનો ફાયદો ઉઠાવશે. જે રીતે એ લોકો દસની નોટની યે પાંચ ગડી વાળીને પોતાની પર્સમાં મૂકી રાખે છે એ રીતે મોબાઈલને પણ ગડીઓ વાળીને પર્સમાં રાખશે !
***
જેન્ટ્સ લોકો જે પોતાના શર્ટના ખિસ્સામાં જાતભાતની કાપલીઓ, કાગળિયાં, વિઝિટીંગ કાર્ડઝ, પરચૂરણ વગેરેના ડૂચા ભરી રાખે છે એમાં હવે કાપલીઓની જોડે મોબાઈલ પણ ગડી વાળીને મુકતા થઈ જશે.
***
ટ્રેનોમાં અને બસોમાં અપ-ડાઉન કરનારા મુસાફરો જે રીતે ટિકીટને ગડી વાળીને ઘડિયાળના બેલ્ટમાં ખોસી રાખે છે એ જ રીતે હવે મોબાઈલને પણ ગડી વાળીને ખોસી રાખશે.
***
એ તો ઠીક, સુથારો – મિસ્ત્રીઓ વગેરે તો કાન ઉપર પેન્સિલ ખોસી રાખે છે એ રીતે બીજા કાન ઉપર મોબાઈલ ખોસી રાખશે !
***
સ્કુટર – બાઈક પર જતાં તો કેટલું ઈઝી થઈ જવાનું ! કાનમાં બ્લુ-ટુથનો ડટ્ટો ભરાવવાને બદલે ગડી વાળીને સીધો ફોન જ કાનમાં ખોસી દેવાનો ને ?
***
અમુક મસલ્સવાળા બોડીબાજો, જે ટુંકી બાંયના ટી-શર્ટો પહેરીને બાવડાનાં ગોટલા બતાડે છે એ લોકો ટી-શર્ટની બાંયમાં ગડી વાળીને મોબાઈલ રાખી શકશે.
***
કોલેજમાં અને સ્કુલોમાં મોબાઈલ લઈ જવામાં કેટલી આસાની થઈ જશે ! ગડી વાળીને મોબાઈલ નોટમાં જ ખોસી દેવાનો !
***
જો ક્લાસના સર તમારો મોબાઈલ પકડવા આવે તો ફટાફટ ગડી વાળીને મોંમાં મુકી દેવાનો !
***
બાકી છેવટે… જ્યારે મોબાઈલ બગડી જાય ત્યારે એની ‘ગડી’ વાળવાને બદલે ‘ભૂંગળી’ વાળીને…
***
- મન્નુ શેખચલ્લી
Comments
Post a Comment