આજકાલ એવા ન્યુઝ આવી રહ્યા છે કે એમાં મમરો મુકવાનું મન થઈ જ જાય ! જુઓ…
***
ન્યુઝ
રાહુલ ગાંધીએ અગાઉ વડાપ્રધાનને ઝપ્પી આપ્યા પછી સાથી કોંગ્રેસ સામે જોઈને આંખ મારી હતી. એ જ રીતે નિર્મલા સીતારામન ઉપર શાબ્દિક પ્રહારો કર્યા પછી સાથી કોંગ્રેસને આંખ મારી.
મમરો
સીધી વાત છે, નિર્મલાજીને અચાનક ઝપ્પી થોડી આપી શકાય ?
***
ન્યુઝ
નિર્મલા સીતારામને કહ્યું કે બોફોર્સ વડે કોંગ્રેસની સત્તા ગઈ પણ રાફેલ વડે ભાજપને ફરી સત્તા મળશે.
મમરો
અરે બાપરે ! મતલબ કે ચૂંટણી પહેલાં પાકિસ્તાન જોડે યુધ્ધ થશે ?
***
ન્યુઝ
કોંગ્રેસ દેશના 5 કરોડ ખેડૂત પરિવારોને લોનમાફીનું વચન આપવા માંગે છે.
મમરો
લાગે છે કે ચૂંટણીની જાહેરાત થાય એ પહેલાં વધું 5 કરોડ લોકો ખેડૂત બની જશે !
***
ન્યુઝ
મનમોહનસિંહના વડાપ્રધાનપદ ઉપર આધારિત ફિલ્મ ‘એક્સીડેન્ટલ પ્રાઈમ મિનિસ્ટર’ આવી રહી છે.
મમરો
ફિલ્મ તો આવતાં આવશે પણ ભાજપ અને કોંગ્રેસ વચ્ચે અત્યારથી એક્સીડેન્ટો થવા લાગ્યા છે !
***
ન્યુઝ
દમણ અને દીવ વચ્ચે હવે રો-રો ફેરી શરૂ થશે.
મમરો
ઓકે. ધેટ મિન્સ કે જો દીવમાં ખાસ મઝા ના આવે તો તમે ફટાફટ દમણ જઈ શકો છો !
***
ન્યુઝ
ઓલ ઇન્ડિયા રેડિયોની રાષ્ટ્રિય ચેનલ ગઈકાલથી બંધ થઈ ગઈ છે.
મમરો
જો આ ન્યુઝ માત્ર આકાશવાણીના ન્યુઝ બુલેટિનમાં આવ્યા હોત તો તો એ વાતની કોઈને ખબર જ ના પડી હોત ને !
***
- મન્નુ શેખચલ્લી
Comments
Post a Comment