પંદરમી ઓગસ્ટ આવે ત્યારે જ યાદ આવે છે કે આ દેશમાં ખરેખર કોણ કોણ આઝાદ છે...
***
ભલે તમે હપ્તા ભરો
કાર, ઘર કે ભણતરના
હપ્તે-હપ્તે છટકી જનારા
માલ્યા-નીરવ આઝાદ છે.
***
ભલે તમે ઊભા રહો
રેડ-લાઈટના સિગ્નલ પર
લાલ-ભૂરી લાઈટોવાળા
વીઆઈપી આઝાદ છે.
***
સંજય દત્ત ભલે ત્રણ વાર પરણે...
સલમાન ખાન આઝાદ છે.
***
પતિઓ ભલે ફાંકા મારે....
પત્નીઓ જ આઝાદ છે!
***
એવું નથી કે ગુલામ હોય
ગર્લફ્રેન્ડને કહે એમ જ કરે,
આજકાલ કોઈ અકક્લમઠા
બોયફ્રેન્ડો ય આઝાદ છે !
***
લાઈક માગો તો ના આપે
ના માગો ત્યાં કોમેન્ટ કરે
ફેસબુકના ફ્રેન્ડો પણ, સાલા
કેવા મળ્યા આઝાદ છે !
***
મનફાવે તે લખી શકો
મન ફાવે તે બોલી શકો
ડર છે સોશિયલ મિડીયાને
કે સોશિયલ મિડીયા જ આઝાદ છે !
***
ફોલોઅર્સ ‘ફોલો’ જ કરે ?
ના આડુંઅવળું ‘ટ્વિટ ’ કરે ?
લાખો મહીં ‘ભૂતિયા’ નીકળ્યા
તો ‘જીવતા’ શું આઝાદ છે ?
***
મોદીજી ભલે ટીશ્યુ પેપર
લુછીને ખિસ્સે મુકે
પાન-મસાલા થૂંકનારા
ઠેર ઠેર આઝાદ છે !
***
રાહુલજી આઝાદ છે
પ્રિયંકા આઝાદ છે
કોંગ્રેસીઓ ભલે ના માને
પણ ગુલામનબી યે ‘આઝાદ’ છે !
***
(છેલ્લે, અમદાવાદીઓની પીડા)
ગાડી છે પણ પાર્કિંગ ક્યાં ?
ટ્રાફિક પોલીસની ધોંસ છે…
બસ, GJ-1 સિવાયનાં
વાહનો જ આઝાદ છે !
- મન્નુ શેખચલ્લી
Comments
Post a Comment