આજે સ્થિતિ એવી છે કે અડધું ગુજરાત વરસાદમાં છે અને અડધું ગુજરાત હજી કોરું છે. અરે, કોરા ભીનાની ક્યાં માંડો છો ? આમ જોવા જાવ તો આખું ગુજરાત ‘ડ્રાય’ જ છે ને !
ગુજરાતની આવી અનેક લાક્ષણિક્તાઓ છે. જરા ગૌર ફરમાવો….
***
બોસ, આ ગુજરાત છે…
અહીં દાળવડાં માટે
‘લાઈન’ લાગે છે…
અને કારની ડિલીવરી
‘તત્કાળ’ મળે છે !
***
બોસ, આ ગુજરાત છે…
અહીં નવરાત્રિમાં
ઓરકેસ્ટ્રા ‘લાઈવ’ હોય છે
પણ મંદિરોમાં
આરતી ‘રેકોર્ડેડ’ હોય છે !
***
બોસ, આ ગુજરાત છે...
અહીં ટ્યૂશન ક્લાસોમાં
‘એસી’ હોય છે
પણ બધું ‘હોટ’ તો
કોલેજોની બહાર હોય છે !
***
બોસ, આ ગુજરાત છે…
અહીં આશ્રમોમાં ક્યાંક
‘લીલા’ થાય છે
પણ મોંઘવારીમાં
સૌની ‘લાલ’ થાય છે !
***
બોસ, આ ગુજરાત છે…
અહીં સ્ટેટ આખું ‘ડ્રાય’ છે
પણ ‘ભીનું’ તો
લઠ્ઠાકાંડમાં જ સમેટાય છે !
***
બોસ, આ ગુજરાત છે…
અહીં ‘ભડકે બળે’ એને
શેરબજાર કહે છે
અને ‘ઠંડુ’ થઈ ગયું હોય
એને બૈરું કહે છે !
***
બોસ, આ ગુજરાત છે…
અહીં માનવીઓ
‘મુઠ્ઠી ઊંચેરા’ ભલે હશે
પણ પૂતળું તો
‘વર્લ્ડ-રેકોર્ડ’ હાઈટનું જ હશે !
***
યસ બોસ, આ ગુજરાત છે…
શાળામાં લીધેલી પ્રતિજ્ઞા
અહીં જ સાચી પડે છે.
દરેક પુરુષ અહીં ‘ભાઈ’ છે
અને દરેક મહિલા
આપણી ‘બહેન’ થાય છે !
- મન્નુ શેખચલ્લી
Comments
Post a Comment