જે રીતે આઈફોનની સરખામણી ચાઈનિઝ ફોન જોડે ના થાય, એ રીતે અમુક ભલતી-સલતી ચીજોની સરખામણી શક્ય જ નથી. છતાં જુઓને, કેવી કેવી કંપેરિઝનો બંધબેસતી આવે છે !...
***
ફેસબુકમાં આવતી ‘સ્માઈલી’ અને શાકવાળાએ આપેલી ઝભલા કોથળીમાં તાત્વિક રીતે કોઈ ફરક હોતો નથી.
***
‘વિચારોત્તેજક’ પોસ્ટ વાંચીને આવતો દેશભક્તિનો ઉભરો અને શેરડીના રસ ઉપર જામેલું ફીણ… બન્ને ગુણાત્મક રીતે સરખાં જ હોય છે.
***
‘રિયાલીટી’ અને ‘વાસ્તવિક્તા’ વચ્ચે એટલું જ અંતર હોય છે જેટલું કોઈ હોલીવૂડની મૂવી અને મોંઘવારી વચ્ચે હોય છે….
કારણ કે, રિયાલીટી = હોલીવૂડ મૂવી
અને વાસ્તવિક્તા = મોંઘવારી.
***
મોબાઈલમાં વારંવાર ચોંટીને ચાલતી મૂવી અને મોલમાં વારંવાર ચોંટી જતી ગર્લફ્રેન્ડ બન્નેનો ત્રાસ સરખો હોય છે.
***
તમારી ફોરવર્ડીયા ઝુંબેશને અંગૂઠો બતાડનાર વ્યક્તિ… અને રિઅલ લાઈફમાં તમને દૂરથી જ ‘ઠેંગો’ બતાડીને છટકી જનાર વ્યક્તિ… બન્ને સઈમ હોઈ શકે છે. સાવધાન.
***
યાદ રાખો, કોઈપણ ટ્રાફિકમાં એમ્બ્યુલન્સ વાનની સ્પીડ કરતાં પિઝા ડિલીવરી બોયની સ્પીડ હંમેશાં વધારે જ રહેવાની.
ડેડ-બોડી ઠંડુ પડી જાય તો ચાલે, પિઝા ઠંડો ન પડવો જોઈએ… યો !
***
વાઈરલ વિડીઓની નીચે વધતી જતી વ્યુઅર્સની સંખ્યા ઢોળાઈ ગયેલી ચાસણી ઉપર ભેગી થતી માખીઓ જેવી હોય છે…
અને તમે અપ-લોડ કરેલા વિડીયોના વ્યુઅર્સની સંખ્યા વાસી રોટલીને સુંઘ્યા વિના જતાં રહેતાં કૂતરાંઓ જેવી હોય છે !
***
બાકી, કોઈ નવું ‘રિ-મિક્સ’ સાંભળ્યા પછી જ.... જુનું ઓરિજિનલ ગાયન ‘કેટલું મસ્ત હતું’ એવો ખયાલ એવા લોકોને આવે છે…
જેઓ કોઈ મેરેજમાં ડાન્સ કરી રહેલાં આન્ટીને જુએ ત્યારે જ વિચારે છે કે “યાર… આન્ટી જવાનીમાં કેવાં મસ્ત લાગતાં હશે, નંઈ !”
- મન્નુ શેખચલ્લી
Comments
Post a Comment