આ ખડૂસ નેતાઓ મંડપો બાંધીને ઉપવાસ કરવાના દેખાડા કરે એની આટલી બધી ચર્ચા ?
Farce (યાને કે અતિશયોક્તિથી ભરેલું ધતિંગ) હવે કોમેડી નાટકોમાંથી નીકળીને વાસ્તવિક્તામાં આવી ગયું છે ! તો ચાલો, એ ફાર્સનું જ પિષ્ટપેષણ કરીએ ?
***
અચોક્કસ ઉપવાસ
અચોક્કસ મુદતના નહીં, અચોક્કસ મુદ્દાના ઉપવાસ ! જાણે સડક ઉપર ઉપવાસ કરવાથી સંસદનો શોર બંધ થઈ જવાનો હોય !
***
કટિંગ ઉપવાસ
અડધી ચાયની જેમ હવે કટિંગ ઉપવાસ ચાલુ થયા છે ! સવારે 10-30થી સાંજે 4.30… અસહિષ્ણતાનો વિરોધ પણ સહનશીલતા વિનાનો !
***
સ્ટિંગ ઉપવાસ
કોઈ છોલે ભટુરે ખાતાં ઝડપાય, કોઈ પીવાના પાણી વડે કુલરો ચલાવતા દેખાય, અને કોઈ મંડપોની પાછળ ‘ભૂખ’ સમર્થકો માટે ‘ફૂડ’ પેકેટો વહેંચાય !
શેક્સપિયર કહી ગયો હતો : “ધ વર્લ્ડ ઈઝ અ સ્ટેજ !”
જી હા, કોમેડી નાટકોના તખતા વિશાળ થઈ ગયા છે.
***
પ્રતિ-ઉપવાસ
પ્રતીક ઉપવાસ નહીં...
પ્રતીક ઉપવાસની સામે પ્રતીક ઉપવાસ…
યાને કે ‘એન્ટી-ઉપવાસ!’
(કોઈ ખાઉધરા બનીને ઉપવાસનો વિરોધ કરો ને ?)
***
ના-મરણાંત ઉપવાસ
બિચારા ગાંધીજીના આમરણાંત ઉપવાસને લીધે આખા દેશને ટેન્શનો થઈ જતાં હતાં, હવે તો ના-મરણાંત ઉપવાસો જ છે !
નેતા ? અને ભૂખે મરે ? ખાંડ ખાઓ છો, ખાંડ…
***
લોકપાલ ઉપવાસ
આ ઉપવાસ ઇન્સ્ટોલમેન્ટમાં કરી શકાય છે. હમણાં તો છ મહિનાનું ઇન્સ્ટોલમેન્ટ લીધું છે, આગળ જતાં એકાદ મન્થલી હપ્તો આવશે ?
કે પછી બે ‘કટિંગ’ હપ્તા ?
***
ગુપ્ત ઉપવાસ
હેં ? કોણ કરી રહ્યું છે. ગુપ્ત ઉપવાસ ?
ઓફિસોમાં, બંગલાઓમાં ખૂણે ખૂણે છુપા કેમેરા ગોઠવો ! શોધી કાઢો કે આ ગુપ્ત કારસ્તાન કોનું છે ?
… છેવટે ખબર પડે કે બિચારાં ગરીબ મા-બાપ પોતાના સંતાનો ભૂખ્યાં ના રહે એ માટે પોતે ભૂખ્યા રહ્યા છે એ વાત છૂપાવી રહ્યા હતા…
- મન્નુ શેખચલ્લી
Comments
Post a Comment