નીરવ મોદીની બેન્ક ડિક્શનેરી

નીરવ મોદીએ તો બેન્કિંગની આખી પરિભાષા જ બદલી નાંખી છે ! જરા વિચારો, નીરવ મોદીની પર્સનલ ડિક્શનેરીમાં બેન્કોને લગતા શબ્દોના શું અર્થ થતા હશે ?
* * *

પાસબુક

જે અધિકારીઓ કરોડોની લોન ‘પાસ’ કરે છે એમને જે ગુડ ‘બુક’માં રાખવા પડે છે તેનું નામ.
* * *

એન્ટ્રી

દેશમાંથી ‘એક્ઝિટ’ કરતાં પહેલાં વિદેશોમાં જે નાણાંઓનો ‘પ્રવેશ’ કરાવી લેવાનો હોય છે તે પ્રોસિજરનું નામ.
* * *

પાસવર્ડ

‘બેન્ક તમારા બાપની છે’ એવો બેન્ક દ્વારા જ જારી કરાયેલો સ્પેશીયલ ખિતાબ.
* * *

LOU

L = લાફ, O = આઉટ, U = અનલિમિટેડ
* * *

ક્રેડિટ

કેટલું મોટું ‘કરી નાંખવાની’ કેપેસિટી છે તેની બજારમાં ઊભી થયેલી ‘શાખ’.
* * *

ડિપોઝિટ

બેન્કોના રૂપિયા પોતાના બાપના સમજીને પોતાના ખાતામાં જમા કરી લેવાની પ્રોસિજર.
* * *

વિથડ્રોઅલ

કૌભાંડ છેક  નાક લગી આવી જાય પછી તેમાંથી બહાર નીકળીને હાથ ખંખેરી નાંખવાની પ્રોસિજર.
* * *

ઇન્ટ્રેસ્ટ

માત્ર મીડિયાને પડશે તે પણ એકાદ-બે મહિના માટે જ.
* * *

સર્વિજ ચાર્જ

કૌભાંડોની દુનિયામાં ભારતનુ્ં નામ ઈન્ટરનેશનલ લેવલે પહોંચાડવાનું મહેનતાણું (11,400 કરોડ)
* * *

LOAN

L = લેવાની, O = ઓપનલી , A = આપવાની, N = નહીં.
* * *

રિકવરી

આશ્વાસન ઈનામ તો મળશે, તેવું આશ્ર્વાસન.
* * *

લુકઆઉટ / નોટિસ

દેખાવ (લુક) પુરતી બહાર (આઉટ) પાડવામાં આવતી નમાલી નપુંસક ચેતવણી.
* * *

વોરંટ

ભારતીય બેન્કિંગ સિસ્ટમની સૌથી ઊંચી જોક.

- મન્નુ શેખચલ્લી