સ્માર્ટ ફોનની સ્માર્ટ કહેવતો

ફોરવર્ડ કરવાથી ફોરવર્ડ ના થવાય

ને શેર કરવાથી સવાશેર ના થવાય.

***

ગૂગલ કરે તેને જડે… પણ

ગૂગલમાં હોય તો મગજમાં જડે ને ?

***

પૂછતાં પૂછતાં પહોંચી જવાય

ગૂગલ મેપમાં ગોળ ગોળ ફરાય.

***

ગુરુ સાચો માર્ગ બતાડે

ગૂગલ તો માર્ગમાં ટ્રાફિક પણ બતાડે !

***

SIM હોય તો સીમાડે જવાય

SIM વિના સ્માર્ટ ના થવાય.

***

SIM ભલે હોય ‘જીઓ’

પણ ‘લાઈફટાઈમ’ હોય તોય મરો !

***

ગરબા વિનાનું ‘લોલ’

પ્રાઈઝ વિનાનું ‘ટેગ’

અને ઓળખાણ વિનાના ‘ફ્રેન્ડ’...

બધું સ્માર્ટફોનમાં જ હોય.

***

DPમાં જે ‘પાઉટ’ કરે

ને ‘પોસ્ટ’માં મુકે ‘કીસ’

એની ફેસબુક ફાંકડી

ફ્રેન્ડઝ મલે એકસો વીસ.

***

જેની સેલ્ફી બગડી એની સાંજ બગડી
અને જેનો DP બગડ્યો એનો દહાડો બગડ્યો.

***

વહેંચવા છતાં ખૂટે નહિ…

એને કહેવાય ‘શેર’ કર્યું !

***

બેઠાં બેઠાં ફોલો કરે

ચાલ્યા વિના ફોલો કરે

સમજ્યા વિના ફોલો કરે

એને અંધશ્રદ્ધાળુ નહિ

‘સ્માર્ટ’ ફોનવાળા કહેવાય !

***

સર્ચ કરવા એન્જિન છે

તોય માગે ‘લિન્ક’

ખુરશીમાંથી હલવું નથી

તોય માગે ‘સ્પીડ’ !

***

યુ-ટ્યુબ જોઈને રસોઈ કરે

ને ફેસબુક જોઈને ફેશન

ઓનલાઈન જોઈને શાક મંગાવે

એનું નામ મોડર્ન વુમન !

***

- મન્નુ શેખચલ્લી