કેટલાક સમાચારો ઓલરેડી મસાલેદાર હોય છે. પરંતુ એમાં જરી અમથો વઘાર કરીએ તો તે વધારે ચટાકેદાર બની જાય છે ! જુઓ નમૂના…
***
સમાચાર
રાહુલ ગાંધી ‘નમો’ એપ ડિલીટ કરવા માગતા હતા પણ કંઈક એવું થયું કે કોંગ્રેસની જ એપ બંધ થઈ ગઈ.
વઘાર
થોડા દિવસો પહેલાં મેઘાલયમાં પણ આવું જ કંઈક બની ગયું હતું ને !
***
સમાચાર
ક્યાંક કરોડોની તો ક્યાંક લાખો રૂપિયાની જૂની 500/1000ની નોટો ઝડપાઈ રહી છે.
વઘાર
જોયું ? જુની નોટોના હજી ભાવ ઉપજે છે ! એટલે જ માયાવતીજી ત્રીજો મોરચો રચવા માગે છે.
***
સમાચાર
ઇન્ટરનેટની સ્પીડના મામલે ભારત હજી દુનિયામાં છેક 109માં નંબરે છે.
વઘાર
એક મિનિટ, સ્પીડ આ રીતે ના મપાય... મુકેશ અંબાણીના દિકરાની સગાઈના ફોટા કેટલી ઝડપથી આખા દેશમાં ફેલાઈ જાય છે એની ઉપરથી ભારતની સ્પીડ નક્કી થવી જોઈએ !
***
સમાચાર
ધારાસભ્યોની મત-વિસ્તારની ગ્રાન્ટ 1 કરોડથી વધારીને 1.5 કરોડની કરવામાં આવી છે.
વઘાર
નવરા નાગરિકો માટે ખુશખબર… હવે રાજ્યભરમાં ‘બાંકડાઓની સંખ્યા’ વધી જવાની છે !
***
સમાચાર
બોલ-ટેમ્પરીંગના મામલે ઓસ્ટ્રેલિયાના ક્રિકેટરો દુનિયાભરમાં બદનામ થઈ ગયા.
વઘાર
એટલે જ કહીએ છીએ કે બોલ-ટેમ્પરીંગ કરતાં મેચ-ફિક્સિંગ જ વધારે સલામત છે ! પૂછી જુઓ લલિત મોદીને…
***
સમાચાર
તમારી કોઈ માહિતી ગુપ્ત નથી. સરકારને તમારું નામ, સરનામું, ફિંગરપ્રિન્ટ તથા લોકેશન… બધાની ખબર છે.
વઘાર
બીજું બધું તો સમજ્યા, પણ યાર, ‘લોકેશન’ની ખબર પત્નીને ના પડવી જોઈએ !
-મન્નુ શેખચલ્લી
Comments
Post a Comment