ગુજરાતના એક જાણીતા કવિનો એક શેર આજકાલવારંવાર યાદ આવે છે :
“રોજ લંબાયા કરે
ને લાજ પણ રાખે છે,
ભર-સભામાં દ્રૌપદીનાં
ચીર જેવું જીવન લાગે છે.”
આપણી આસપાસ જે ઘટનાઓ
બની રહી છે તે જોતાં આ જ તરજ પર નવા શેર ઉમેરવાનું મન થાય છે…
***
ધીમી બળે છે, ને
વધુ લિજ્જત આપે છે
સમસ્યા હોલવાય શેની ?
અહીં, સૌની ખિચડી પાકે છે !
***
ફરે છે ગોળ ગોળ
છતાં ઝડપી લાગે છે,
જાયન્ટ વ્હીલમાં જ હવે,
વધુ 'વિકાસ' લાગે છે !
***
તળિયાઝાટક થવાનું
મળશે જરૂર કોઈ કારણ
ચોરો ભાગી ગયા પછી
ચોકીદારો રોજ જાગે છે !
***
સ્કેમ, કપટ, કરતબ,
ધર્મ, સિદ્ધાંતને અહમ્
એક જ મલ્ટિપ્લેક્સમાં
કેટલી ફિલ્મો ચાલે છે !
***
પાંચ, સાત કે નવ ?
કેટલાં મીંડા આવે છે ?
નિત નવાં કૌભાંડો
ગણિત પાકું કરાવે છે !
***
ડૂબ્યાં આખાં વહાણ
ત્યાં દૂરથી હોડી આવે છે
ને ભાગેડૂ ઉંદરોનાં
જીવમાં જીવ આવે છે !
***
જેટલું દોડો, એટલા જ
સાલા, દૂર ભાગે છે
ઝાંઝવાના જળ સમા
‘અચ્છે દિન’ લાગે છે !
***
આન, ઇજ્જત, સ્વાભિમાન
શું શું બચાવે છે...
એકાદ જૂનું ટાયર
કેટલું કામ આવે છે !
***
દેર છે, અંધેર નથી
ઠાલી નથી સાવ આશા
સવાર પડવા આવે
ત્યાં જ લાઈટ આવે છે !
- મન્નુ શેખચલ્લી
Comments
Post a Comment