બોર્ડની એક્ઝામોમાં સ્ટુડન્ટો કરતાં એમનાં મમ્મી-પપ્પાઓના ટેન્શનો વધી જતાં હોય છે !
આ તો સારું છે કે બોર્ડવાળા મા-બાપોની પરીક્ષાઓ લેતા નથી… જોકે અમે મમ્મી પપ્પાઓ માટે એક ખાસ નવું પ્રશ્નપત્ર બનાવી કાઢ્યું છે…
***
ફરજિયાત પ્રશ્ન (૧)
તમે જ્યારે દસમા કે બારમાની પરીક્ષા આપેલી ત્યારે તમે કેટલા ટકા લાવેલા ? સાચું બોલજો…
***
ટૂંકનોંધ લખો
(૧) એક્ઝામ સેન્ટરની બહાર બેઠાં બેઠાં અંદરની ચિંતાઓ કરવાની કળા.
(૨) બાળકો માટે બાધાઓ રાખવાનું મહત્ત્વ.
(૩) ગિફ્ટમાં આવેલી ફાલતુ બે ડઝન બોલપેનોનું રિ-સાયકલિંગ કરવાના ઉપાયો.
(૪) ટ્યૂશન ફીના પૈસા વસૂલ કરવાના વિવિધ ઉપાયો.
(૫) સ્કુટી, સ્કૂટર કે બાઈક અપાવવાથી થતી આડ અસરો.
***
ફરજિયાત પ્રશ્ન (૨)
તમે બોર્ડની પરીક્ષામાં ૯૦ ટકાથી વધારે માર્કસ નહોતા લાવી શક્યા તેના કારણે જિંદગીમાં તમારી ઉપર કેટલાં આભ તૂટી પડ્યા છે ?
***
ખાલી જગ્યા પૂરો
(૧) બાબા કે બેબીના ભવિષ્યની ચિંતાઓ કરવાની જવાબદારી ……………. ની છે. (આપની / બાપની)
(૨) બેફામ રીતે વધતી જતી સ્કૂલ તથા ટ્યૂશનની ફી માત્ર …………. નો વિષય છે. (ખર્ચાનો /ચર્ચાનો)
(૩) માત્ર 65 ટકા માર્કસ લાવનાર સંતાનોને આપણી ………… માં આવવાનો કોઈ હક નથી. (દુનિયામાં /ફેસબુકમાં)
(4) 98 ટકા માર્કસ લાવવા છતાં રડ્યા કરતાં બાળકો કરતાં 45 ટકા માર્ક્સ લાવીને હસ્યા કરતાં બાળકો વધુ ……….. છે. (નફ્ફટ / સ્માર્ટ)
(૫) પોતાનાં સંતાનો વિશે ડંફાશો માર્યા કરતી મમ્મીઓ આગળ આપણને પણ …………… મારવાનું મન થાય છે. (ડંફાશ / ગપ્પાં)
***
ફરજિયાત પ્રશ્ન (૩)
જો તમારે આજે 10માં કે 12માની પરીક્ષા આપવાની આવે તો તમારાં સંતાનો જેટલાં જ ટ્યૂશનો અને ઉજાગરા કર્યા પછી તમે કેટલા ટકા લાવી શકો તેમ છો ?
***
વિચાર વિસ્તાર કરો
“વિચારોનો અમલ કરવાનો વિચાર હંમેશા વિચારણા હેઠળ જ હોય છે !”
- મન્નુ શેખચલ્લી
Comments
Post a Comment